काठमाडौं । नेपालस्थित क्यासिनो माजोङले फेरि एकपटक दक्षिण एसियाको उत्कृष्ट क्यासिनो (‘बेस्ट क्यासिनो इन साउथ एसिया’) उपाधि जितेको छ। भारतको नयाँदिल्लीमा आयोजित २०औं ‘टुरिजम, ट्राभल एन्ड हस्पिटालिटी अवार्ड–२०२५’ कार्यक्रममा माजोङले पाँचौँ पटक यो अवार्ड जित्दै आफ्नो अग्रस्थान कायम राखेको हो।

गत शुक्रबार राति ‘होटल दि अशोक’मा भएको समारोहमा भारतका संस्कृति तथा पर्यटन मन्त्री गजेन्द्रसिंह शेखावतले माजोङका प्रबन्ध निर्देशक विनोद श्रेष्ठलाई अवार्ड हस्तान्तरण गरे। २७ वर्षदेखि पर्यटन व्यवसायमा सक्रिय श्रेष्ठले क्यासिनो, होटल र ट्राभल क्षेत्रमा निरन्तर लगानी गर्दै आएका छन्।

नेपालकै नम्बर–१ क्यासिनो मानिने माजोङले पछिल्ला वर्षहरूमा विदेशी पर्यटक भित्र्याउने र सेवा–गुणस्तरमा सुधार ल्याउने कामलाई प्राथमिकता दिएको छ। यही कारण, ‘हस्पिटालिटी इन्डिया पब्लिकेसन्स ग्रुप’ले दक्षिण एसियाका क्यासिनोहरूको सेवा स्तर, कारोबार र पर्यटक सन्तुष्टिमाथि गरेको अध्ययनमा माजोङ पुनः शीर्ष स्थानमा पुगेको हो।

त्यसै समारोहमा माजोङ नेपालगञ्जले ‘बेस्ट क्यासिनो इन नेपाल’ अवार्ड पनि जितेको छ। सोही शाखाका महाप्रबन्धक निरजकुमार प्रधानले ‘बेस्ट क्यासिनो जनरल म्यानेजर इन साउथ एसिया’ अवार्ड प्राप्त गरे— यो उनको लगातार दोस्रो जित हो।

यसअघि पनि माजोङले सन् २०१९, २०२२, २०२३ र २०२४ मा ‘बेस्ट क्यासिनो इन साउथ एसिया’ अवार्ड जितिसकेको छ। नेपालगञ्ज शाखाले २०२३ र २०२४ मा ‘बेस्ट क्यासिनो इन नेपाल’ उपाधि हात पारेको थियो।

दक्षिण एसियाको हस्पिटालिटी क्षेत्रमा प्रतिष्ठित मानिने यो अवार्डले नेपाललाई पुनः अन्तर्राष्ट्रिय पर्यटन नक्सामा उज्यालो बनाएको छ।

विनोद श्रेष्ठका अनुसार, “यो सफलता केवल माजोङको होइन, सम्पूर्ण नेपाली पर्यटन उद्योगको हो।”