भक्तपुर, कार्तिक २१। नेसनल प्याव्सन भक्तपुरको आयोजनामा बिहीबार सदस्य विद्यालयका कक्षा १० का विद्यार्थी तथा गणित विषय शिक्षकहरूका लागि “अनिवार्य गणित विषयको एक दिने एसईई अभिमुखीकरण कार्यक्रम–२०८२” सम्पन्न गरिएको छ। आगामी शैक्षिक सत्र २०८२ को माध्यमिक शिक्षा परीक्षा (एसईई) मा सहभागी हुने विद्यार्थीहरूलाई लक्षित गरी गरिएको कार्यक्रममा गणित शिक्षा परिषद्‌का राष्ट्रिय अध्यक्ष तथा विषय विज्ञ डा. रमेश प्रसाद अवस्थीले अभिमुखीकरण गर्नुभएको थियो।

कार्यक्रममा गणित विषयलाई कठिन नभई सहज र सरल तरिकाले कसरी सिक्न र सिकाउन सकिन्छ भन्ने विषयमा अन्तर्क्रिया गरिएको थियो। विद्यार्थीहरूले गणितलाई प्रायः बोझका रूपमा बुझ्ने भएकाले यस विषयप्रतिको डर हटाई आत्मविश्वास बढाउने उद्देश्यले कार्यक्रम आयोजना गरिएको नेसनल प्याव्सन भक्तपुरका कार्यसमिति सदस्य रमेश प्रसाद सिटौलाले जानकारी दिनुभयो।

कार्यक्रममा संस्थाका उपाध्यक्ष राम प्रसाद खाताखोले स्वागत मन्तव्य व्यक्त गर्दै कार्यक्रमको औचित्य स्पष्ट गर्नुभएको थियो।

त्यसैगरी, नेसनल प्याव्सन भक्तपुरका अध्यक्ष संजय खड्काले गणित विषयलाई व्यवहारिक ज्ञानसँग जोडेर हेर्नुपर्ने बताउँदै, डा. अवस्थीले प्रस्तुत गरेका उपयोगी उपायहरू विद्यार्थीहरूले अध्ययनमा अपनाउनुपर्नेमा जोड दिनुभयो। उहाँले गणित विषय पनि दैनिक अभ्यास र क्रियाकलापमार्फत सहज रूपमा सिक्न सकिने उल्लेख गर्नुभयो।

अध्यक्ष खड्काले नेसनल प्याव्सन भक्तपुरले आगामी महिनामा अनिवार्य विज्ञान र सामाजिक विषयका लागि पनि कक्षा १० का विद्यार्थीहरूलाई लक्षित गरी अभिमुखीकरण कार्यक्रम आयोजना गर्ने जानकारी दिनुभयो।