भक्तपुर, कार्तिक २० — इडिफाइ प्राइभेट स्कूल अर्गनाइजेसन नेपाल (ईप्सन) द्वारा आयोजित अन्तरविद्यालय लोक नृत्य तथा एकल नृत्य प्रतियोगितामा सूर्यविनायक–५ स्थित यूनिटी स्कूलले दुवै विधामा प्रथम स्थान हासिल गरेको छ।

सदस्य विद्यालय बिमल मेमोरियल विद्यापीठमा सम्पन्न उक्त प्रतियोगिताको सामूहिक लोक नृत्यतर्फ यूनिटी स्कूलले पहिलो स्थान प्राप्त गर्दा इडेन गार्डेन स्कूलले दोस्रो, सूर्योदय स्कूलले तेस्रो र ग्लोबल एकेडेमीले सान्त्वना स्थान प्राप्त गरे।

त्यसैगरी एकल नृत्य प्रतियोगितामा यूनिटी इङ्ग्लिस स्कूलकी दिपशिखा खड्का प्रथम घोषित भइन्। दोस्रो स्थानमा क्वालिटी इङ्ग्लिस स्कूलकी मनिरा तामाङ, तेस्रोमा ईडेन गार्डेन स्कूलकी कृष्टिना श्रेष्ठ र सान्त्वना स्थानमा पारिजात विद्याकुञ्जकी ज्योती खड्का रहिन्।

कार्यक्रमका सभापति एवं आयोजक विद्यालयका प्रधानाध्यापक कुमार थापा मगरले प्रतियोगिता आयोजना गर्ने अवसर पाएकोमा खुशी व्यक्त गर्दै निर्णायक, सहभागी विद्यालय र विद्यार्थीहरूलाई धन्यवाद ज्ञापन गरे।

प्रमुख अतिथि सूर्यविनायक नगरपालिका–१० का वडाध्यक्ष शिवराम राउतले विजेताहरूलाई पुरस्कार वितरण गर्दै यस्तो प्रतियोगिताले विद्यार्थीहरूमा नेपाली लोक संस्कृति र परम्पराप्रतिको रुचि र जगेर्ना बढाउने विश्वास व्यक्त गरे।

ईप्सनका अध्यक्ष तथा क्वालिटी इङ्ग्लिस स्कूलका प्रिन्सिपल जी.बी. खड्काले कार्यक्रम सफलतापूर्वक सम्पन्न गराएकोमा आयोजक विद्यालयप्रति आभार व्यक्त गरे।